1958 онд Улсын Багшийн Дээд Сургуульд “Зураг–хөдөлмөрийн багш”-ийн ангийг нээж Монгол улсад дээд боловсролтой дүрслэх урлаг, хөдөлмөрийн багш бэлтгэж эхэлсэнээр өнөөгийн Дүрслэх урлаг, технологийн сургуулийн суурь тавигдсан. Тус сургуулийн түүх бол дүрслэх урлаг, технологи, дизайны багш бэлтгэж ирсэн төдий биш одоогийн Соёл Урлагийн Их Сургууль /СУИС/-ийн үндсэн ангиуд нээж, багш, зураач, жүжигчин бэлтгэж байснаараа улс орныхоо соёл урлагийн салбарын анхны дээд боловсролтой мэргэжилтэн бэлтгэсэн арвин түүхтэй.
Зураг-хөдөлмөрийн анхны тэнхимийг байгуулж эрхлэгч төрийн хошой шагналт, Ардын зураач Г.Одон, мөн Б.Шагдарсүрэн, А.Даваацэрэн, 1961 онд Б.Чогсом, Д.Гэвшээхүү, Д.Базарсад, Д.Элбэг, Д.Сандагдорж зэрэг нэрт уран бүтээлчид, багш нар ажиллаж байсан түүхтэй.
ОХУ, Япон, БНСУ, БНХАУ, Польш улсын их сургуулиудтай хамтын ажиллагаатай бөгөөд хамтран ажиллах гэрээний хүрээнд БНХАУ-ын 2+2 хөтөлбөр, багш оюутан солилцоо, хамтарсан үзэсгэлэн, уран бүтээлийн хээрийн судалгаа, хээрийн болон үйлдвэрлэлийн дадлагыг хамтран хэрэгжүүлж ажиллаж байна.
